1. Հայտնի ամերիկացի բարերար Ջոն Հանթսմանը 1988-ի երկրաշարժից ի վեր օգնել է Հայաստանին, մասնավորապես Գյումրիում կառուցելով դպրոց և բնակելի թաղամաս, ինչպես նաև ներդրումներ կատարելով Հայաստանի տնտեսության մեջ։ Ըստ ՀՀ կառավարության տվյալների՝ Հանթսմանի ընդհանուր ներդրումները Հայաստանում կազմել են մոտ 20 միլիոն ԱՄՆ դոլար։

2. 2010 թվականին Հանթսմանը որոշել է լիկվիդացնել աշխարհի տարբեր մասերում գտնվող իրեն պատկանող որոշ ձեռնարկություններ, այդ թվում նաև Հայաստանում 1991-ից գործող «Հանթսման Բիլդինգ Փրոդաքթս» ՍՊ ընկերությունը (ՀԲՓ)։ Հանթսմանի ցանկությամբ ՀԲՓ-ի վաճառքից ստացված հասույթը պիտի տրամադրվեր Սիվիլիթաս հիմնադրամին վերջինիս հիմնադիր Վարդան Օսկանյանի միջոցով։

3. Գործարքն իրականացնելու նպատակով Հայաստան է ժամանել Հանթսմանի ներկայացուցիչը։

4. Սիվիլիթաս հիմնադրամի խորհրդի անդամ Տիգրան Կարապետյանի միջնորդությամբ, գնորդ է գտնվել՝ «Շեն Կոնցեռն”-ի սեփականատեր Սամվել Բեգլարյանը։

5. Վերջինս, գնումը ձևակերպելուց առաջ, ուսումնասիրել է ՀՓԲ-ի ֆինանսական վիճակը, ակտիվների և պարտավորությունների կազմը, այդ ընթացքում իրականացվել է նաև հարկային ստուգումներ` պարզելու, թե արդյոք կան հին հարկային պարտավորություններ։ Նա նաև դիմել է Տնտեսական Մրցակցության Պաշտպանության Հանձնաժողովին՝ վաճառքի-գնման գործարքի թույլտվություն ստանալու համար։

6. Հաշվի առնելով, որ նման գործարքները տևում են ամիսներ, իսկ Հանթսմանի ներկայացուցիչը չէր կարող երկար մնալ Հայաստանում, նա 1000 ՀՀ դրամ խորհրդանշական գումարով ՀԲՓ-ի բաժնեմասերի ամբողջ փաթեթը փոխանցել է Տիգրան Կարապետյանին, որպես վստահելի միջնորդի և վստահված անձի, որն իր հերթին, սպասվող եզրակացությունները ստանալուց հետո, համաձայն Հանթսմանի ներկայացուցչի հետ ստորագրած պայմանագրի, պիտի բաժնեմասերը վաճառեր գնորդին և հասույթը փոխանցեր Վարդան Օսկանյանին։

7. Եզրակացությունները ստացվելուց հետո տեղի է ունեցել վաճառքի-գնման գործարքը, իսկ Սիվիլիթաս հիմնադրամի համար նախատեսվող ամբողջական գումարը կազմել է մոտ 2 միլիոն ԱՄՆ դոլար և բաղկացած է եղել երկու մասից.

- ՀԲՓ-ն Սիվիլիթաս հիմնադրամի բանկային հաշվին փոխանցել է 577 898 ԱՄՆ դոլար և 11 494 հազար ՀՀ դրամ, որ միասին կազմել են ՀԲՓ-ի պարտքը իր մայր ընկերություններին՝ «Հանթսման ինթերնեշնլ»-ին և «Պոլիմեր մատերիալզ»-ին, այդպիսով ամերիկյան ընկերություններն իրենց դուստր ընկերությանը ժամանակին տրամադրված փոխառությունները տրամադրել են հիմնադրամին,

- գումարի երկրորդ մասը՝ որն արտարժույթով արտահայտված կազմել է 1 427 հազար ԱՄՆ դոլար, և որը գոյացել է ՀԲՓ-ի բաժնեմասերի վաճառքից, Հանթսմանի ներկայացուցչի հետ պայմանագրի համաձայն, Տիգրան Կարապետյանը փոխանցել է Վարդան Օսկանյանի բանկային հաշվին։

8. Ըստ գործարքին հետևող իրավաբանների ու հարկային մասնագետների՝ քանի որ չի եղել “գույքի հավելաճ” (այսինքն` ակտիվների ձեռքբերման և վաճառքի գների միջև չկա դրական տարբերություն), չի եղել նաև շահույթ, ուստի վաճառքի արդյունքում չի առաջացել շահութահարկ վճարելու պարտավորություն։

9. Վարդան Օսկանյանը, գումարը ստանալու պահից առ այսօր Սիվիլիթաս հիմնադրամի կարիքների համար փոխանցել է 548 հազար ԱՄՆ դոլար։ Այդ ժամանակահատվածում Վարդան Օսակյանի տիրապետման ներքո եղած գումարը կուտակել է 120 հազար դոլար։ Այս պահին մնացորդը կուտակված տոկոսների հետ միասին կազմում է 985 հազար ԱՄՆ դոլար և գտնվում է Վարդան Օսկանյանի բանկային հաշվին։