Մայիսին Սերժ Թանկյանը կմիանա իր Սիսթեմ օֆ ը Դաուն խմբի անդամներին` մեկնելու այս տարվա ամենասպասված շրջագայությանը: Սակայն մինչ կրկին խմբի հետ բեմ բարձրանալը, Թանկյանը մի նոր աշխարհ է գրավում`թատրոնը: «Պրոմեթեուս բաունդ» անվանմամբ Թանկյանի համագործակցությունը հայտնի դրամատուրգ Սթիվեն Սաթերի հետ ներկայումս համաշխարհային պրեմիերայի ընթացքում է Մասաչուսեթսի Քեմբրիջ քաղաքի Ամերիկյան ռեպերտուար թատրոնում:

Սաթերը համոզված է, որ Թանկյանը բոլորովին յուրահատուկ մի բան է արել: «Նա այնպիսի մի երաժշտություն է բերել թատրոն, որը մինչ այդ ոչ ոք չէր լսել»,- ասում է դրամատուրգը: «Մենք պատրաստում ենք նպատակասլաց և արմատական ցուցադրություն: Վերցրել ենք հինավուրց, դասական թատրոնի մի մաս և «միացրել» այն իսկական ռոք-ն-ռոլի հետ:  Կարծում եմ` այս ցուցադրությունը բացահայտում է Թանկյանին որպես երգահան, ում մինչ այդ որպես այդպիսին չեն ճանաչել»: Թանկյանի համար  թատրոնի բնագավառում աշխատելը բոլորովին նոր փորձ է: Դահլիճում նստած լսել, թե ինչպես է ինչ որ մեկը երգում իր հեղինակած երգերը բավական նոր զգացողություն է մի մարդու համար, ով սովոր է միշտ բեմում լինել:

Մարտի 29-ին Գլենդեյլի Բարնես էնդ Նոուբլսի շարքի խանութներից մեկում Թանկյանը նաև ներկայացրեց իր  նոր պոեզիայի հավաքածուն` «Գլերինգ թրու օբլիվիոն» անվամբ: Հավաքածուն Թանկյանի բնագիր պոեզիան է, գունեղ նկարազարդված Ռոջեր Կուպելյանի կողմից: Յուրահատուկ պատկերները գունազարդում են մոտ 70 պոեմներ, որոնցից գրեթե ոչ մեկը հրատարակված չէր եղել մինչ այդ: «Գլերինգ թրու օբլիվիոն»-ը Սերժի երկրորդ պոեմների գիրքն է և նրա «Քուլ գարդենս» դեբյուտային հավաքածուի գովելի շարունակությունը: