Հուլիսի 31-ին, Ավստրիայի մայրաքաղաք Վիեննայում, 71 տարեկան հասակում վախճանվեց Հայաստանի Հանրապետության արտակարգ և լիազոր դեսպան, Սիվիլիթաս հիմնադրամի պատվո խորհրդի անդամ Ջիվան Թաբիբյանը:

Ջիվան Թաբիբյանը Հայաստանի մշտական ներկայացուցիչն էր ԵԱՀԿ-ում, Ատոմային էներգիայի միջազգային գործակալությունում և Վիեննայում տեղակայված ՄԱԿ-ի այլ ստորաբաժանումներում 1998-2008 թթ.: Մինչև 2006 թ. նա եղել է ՀՀ արտակարգ և լիազոր դեսպանը Ավստրիայում, Հունգարիայում, Չեխիայում և Սլովակիայում:

Թաբիբյանի հարուստ գիտական կենսագրությունը և աշխատանքը տարբեր միջազգային կառույցներում, տարբեր երկրների կառավարությունների համար, ինպես նաև հարուստ փորձը բիզնեսում, առիթ են ընձեռել նրան աշխատելու աշխարհի ամենատարբեր կողմերում: Սակայն իր կյանքի վերջին 10 տարիները, Ջիվան Թաբիբյանը նվիրեց Հայաստանի Հանրապետության դիվանագիտական ծառայությանը: Նա շատ արագ դարձավ ԵԱՀԿ-ի մշտական խորհրդի սյուներից մեկը: Տարիներ շարունակ միջազգային իրադարձությունների վերաբերյալ նրա համոզիչ վերլուծություններն ու մեկնաբանությունները ավելին էին, քան միայն Հայաստանի տեսակետները: Ինչպես կազմակերպությունում շատերն էին ասում, դրանք յուրատեսակ ուղեցույց էին կազմակերպության քաղաքականոթյան և ծրագրերի մշակման համար:

Ջիվան Թաբիբյանը ծնվել էր1937 թվականին Լիբանանում: Սովորել է Բեյրութի հայկական դպրոցներում, այնուհետ ավարտել է Բեյրութի Ամերիկյան համալսարանը: Ուսումը շարունակել է ԱՄՆ-ում, Փրինսթոնի համալսարանում, որտեղ ավարտել է դոկտորական աշխատանքը: Ավելի ուշ սովորել է նաև Սորբոնի համալսարանում, ինչպես նաև Փարիզի ռազմավարական և դիվանագիտական հետազոտությունների կենտրոնում:

Ջիվան Թաբիբյանը դասավանդել է մի շարք հեղինակավոր համալսարաններում` Կալիֆորնիայի համալսարանում (քաղաքագիտություն, արևելագիտություն, քաղաքաշինություն և համայնքային հոգեբանություն), Հարավային Կալիֆորնիայի համալսարանում (քաղաքային և տարածքային կառավարում, հանրային քաղաքականություն), Արվեստների կալիֆորնիայի ինստիտուտում (դիզայնի տեսություն), Ուեյք Ֆորեսթ համալսարանում (միջազգային հարաբերություններ): Ջիվան Թաբիբյանը նաև Կալիֆորնիայի արևմտյան հասարակագիտության  Լա Հոյա ինստիտուտի կառավարման և ռազմավարական հետազոտությունների ծրագրի հիմնդիրն ու տնօրենն էր:

Նա աշխատել է որպես խորհրդատու մի շարք կառավարությունների, հաստատությունների և կորպորացիաների համար` ԱՄՆ-ում, Ճապոնիայում, Ֆրանսիայում, Սաուդյան Արաբիայում, Մեքսիկայում, Գվատեմալայում, Վենեսուելայում, Կանադայում և Իրանում: Ջիվան Թաբիբյանի առաջին այցելությունը Հայաստան 1963-ին էր:

Հայաստանում նա իրականացնում էր քաղաքաշինական, տարածքային և տնտեսական զարգացման ծրագրեր: 1991-ին Հայաստանի անկախացումից հետո Ջիվան Թաբիբյանը համագործակցում էր ամենատարբեր սոցիալ-տնտեսական զարգացման ծրագրերի շուրջ: Նա ներգրավված էր հատկապես էներգետիկ, առողջապահական, տնտեսական զարգացմանն ու դիվանագիտությանն առնչվող ծրագրերում: Նա անդամակցում էր Հայաստանի էներգետիկ կարիքները գնահատող էքսպերտային խմբին, որը մշակեց էներգետիկ ռազմավարության ծրագրի նախագիծ: Նա ակտիվորեն ներգրավված էր Մեծամորի ատոմակայանի վերագործարկման ծրագրում:

Սփյուռքի կառույցներում նրա գործունեությունը նույնպես բազմակողմ էր: Նա “Արփա” հետազոտական կենտրոնի հիմնադիր անդամ էր, Զորյան հիմնարկի հիմնադրման սկզբից ներգրավված էր նրա աշխատանքներում, ինչպես նաև AIM ամսագրի մեկնաբան էր:

Հայկական հարցերում ներգրավվածությունից զատ նա նաև դիզայնի ճանաչված մասնագետ էր և կինոյի հարցերով խորհրդատու: Նա աշխատել է Ասպենի  դիզայնի միջազգային կոնֆերանսներում, ինչպես նաև Ռոբերտ Ռեդֆորդի կինոյի և հեռուստատեսության Սանդանսի ինստիտուտում:

Դեսպանի պաշտոնը թողնելուց հետո Ջիվան Թաբիբյանը դարձավ Սիվիլիթաս հիմնադրամի խորհրդի անդամ: Սիվիլիթասի խորհրդի նախագահ Վարդան Օսկանյանը հաճախ է ասում, որ նախարարի պաշտոնում նշանակվելուց հետո դեսպանի պաշտոն զբաղեցնելու իր առաջին  առաջարկը Ջիվան Թաբիբյանին էր: “Ջիվանի խորհուրդները, նրա իմաստնությունը, նրա անփոխարելինելի հումորի զգացումը պարզապես անգնահատելի էին: Մենք բոլորս նրա կարիքը շատ կզգանք բազմաթիվ պատճառներով: Դրանցից ամենակարևորը Հայաստանի և համաշխարհային խնդիրները համարժեք խորությամբ տեսնելու նրա ունակությունն էր ու այդ խնդիրներից յուրաքանչյուրի հիմքում ընկած իրական էությունը հայտնաբերելու և բացատրելու կարողությունը,” ասում է Վարդան Օսկանյանը:

Դեսպան Թաբիբյանի մահը սգում են նրա կինը` Իզաբելլա Չո Թաբիբյանը, որդին` Ջիվանը, դուստրը` Մարին, ԱՄՆ-ում նրա քույրերը` Օլիմպիա Ջեբեջյանն ու Անի Հակոբյանը և նրանց ընտանիքները, ինչպես նաև բազմաթիվ ընկերները, բարեկամներն ու գործընկերները:

Ջիվան Թաբիբյանի հոգեհանգստի արարողությունը տեղի կունենա օգոստոսի 7-ին, ուրբաթ, ժամը 16:00-ին, Կոնդի Սուրբ Հովհաննես եկեղեցում: Հուղարկավորության արարողությունը տեղի կունենա Խոր Վիրապի գերազմանատանը:

Ցավակցական հեռագրերը ընդունվում են Վիեննայում Հայաստանի դեսպանատանը, ինչպես նաև Սիվիլիթաս հիմնադրամի կողմից: