«100 հարց, 100 պատասխան» առաջիկա հանրային քննարկման հյուրը կլինի Հայաստանի արդարադատության նախարար Հրայր Թովմասյանը:  Միջոցառումը կկայանա երեքշաբթի, հունիսի 7-ին, ժամը 16.00-ին, Երևանի «Անի» հյուրանոցի «Անի» սրահում: Ինչպես միշտ, քննարկումը կվարի «Առավոտ» օրաթերթի գլխավոր խմբագիր Արամ Աբրահամյանը:

Ձեր հարցերը կարող եք նախօրոք ուղարկել Սիվիլիթասի կայքի միջոցով և ուղիղ հեռարձակմամբ հետևել միջոցառմանը կամ հետո դիտել խմբագրված տարբերակը:

Հայաստանի մարդու իրավունքների պաշտպան Կարեն Անդրեասյանը մայիսի 24-ի «100 հարց, 100 պատասխան» հանրային քննարկմանը հավաստիացրեց, որ մարդու իրավունքների  պաշտպանության հարցերում պատրաստ է այնքան առաջ գնալ, «որքան թույլ է տալիս օրենքը, … որքան հայ գիտակից հասարակությունը պատրաստ կլինի օգնել ինձ»։

Մայիսին Սիվիլիթասը միջոցառումներ էր կազմակերպել Հայաստանի մարզերում: Մայիսի 31-ի Կապանի միջոցառմանը Սիվիլիթասի վերլուծաբան Թաթուլ Հակոբյանը պատմեց Սյունիքի մի շարք համայնքներում Սիվիլիթասի իրականացրած և ընթացքի մեջ գտնվող գյուղական ծրագրերի մասին, որին հաջորդեց քննարկում «Հանքարդյունաբերություն և բնապահպանություն» թեմայով: Քննարկման մասնակիցներն էին Սյունիքի մարզպետի տեղակալ Վաչե Գրիգորյանը, Կապանի փոխքաղաքապետ Գագիկ Ղարամանյանը և Կապանի Օրհուս կենտրոնի համակարգող Աշոտ Ավագյանը:

Մայիսի 12-ի Գյումրիի քննարկման թեման էր «Արտագաղթի նոր ալիք. ինչո՞ւ են մարդիկ լքում հայրենիքը»: Մասնակիցներն էին «Գալա» հեռուստաընկերության քաղաքական մեկնաբան Դերենիկ Մալխասյանը, Շիրակի մրցունակության կենտրոնի գործադիր տնօրեն Գայանե Ավագյանը և «Արևամանուկ» հիմնադրամի տնօրեն Արմինե Գմյուր-Կարապետյանը:

Ամիսը սկսել էինք ԷԲՐՈՒ-ով: Նորարար փորձառական արվեստի կենտրոնում (ՆՓԱԿ) Թուրքիայի մշակութային բազմազանությանը նվիրված լուսանկարների ցուցահանդեսի բացման առիթով կազմակերպված Սիվիլիթասի հանրային քննարկմանը մասնակցում էին լուսանկարիչ Աթիլլա Դուրակը, փաստաբան և գրող Ֆեթիյե Չեթինը, մարդաբան ու մշակութաբան Այշե Գյուլ Ալթընայը և Արաս հրատարակչատան աշխատակից Թագուհի Թովմասյանը:

Վերջապես ամառը եկավ Երևան: Այն իր հետ Սիվիլիթաս բերեց ուսանողների, ովքեր Հանթսման կրթաթոշակի ծրագրով և մեր հիմնադրամի աջակցությամբ ԱՄՆ Յուտայի պետական համալսարանում չորս տարով ուսանելու հնարավորություն ունեն: Նրանք Հայաստանից և ԱՄՆ-ից այլ ուսանողների հետ աշխատանքի փորձաշրջան են անցնում Սիվիլիթասում:

Սիվիլիթասի կայքը, ինչպես միշտ, ունի նոր վերլուծական հոդվածներ։ Վերջինը Սիվիլիթասի հիմնադիր, Հայաստանի նախկին արտգործնախարար Վարդան Օսկանյանի «Զրոյական աճ» խորագրով հոդվածն էր Հայաստանի ներկա սոցիալ-տնտեսական իրավիճակի մասին: Հետաքրքիր բանավեճերի առիթ տվեց նաև մեր աշխատակից Անի Նավասարդյանի բլոգը ««Մեծացող» ազգի մեծացող հիասթափությունը» վերնագրով:

Սիվիլիթաս հիմնադրամի ընթացիկ և առաջիկա գործունեության մասին առավել մանրամասն կարող եք տեղեկանալ՝ այցելելով մեր կայք www.civilitas.am: