Միմյանց մոտեցնել ՀԿ-ներին ու դոնորներին

Սիվիլիթաս հիմնադրամը նախաձեռնել է Հասարակական կազմակերպությունների ուղեցույց ծրագիրը, որը նաև նպատակ ունի ՀԿ-ներին ու դոնորներին հնարավորինս մոտեցնել միմյանց:

Հայաստանում, ըստ տարբեր տվյալների, գործում են 3,000-ից 5,000 ՀԿ-ներ, որոնցից միայն մի քանի տասնյակի մասին է հնարավոր ճշգրիտ, թարմ տեղեկություններ գտնել համացանցում կամ տեղեկատու գրքերում:

Այս բացը լրացնելու նպատակով Սիվիլիթասը Հայաստանում գործող ավելի քան 150 առավել ակտիվ ու ճանաչված ՀԿ-ներին ուղարկել է հարցաթերթիկ: Շուրջ 100-ը պատասխանել են: Այն ՀԿ-ները, որոնք կցանկանան մաս կազմել մեր ուղեցույցին, կարող են ուղարկել իրենց տվյալները:

Այսպիսի ուղեցույցը ավելի կմոտեցնի պոտենցիալ դոնորին ու ՀԿ-ին, նրանք միմյանց ավելի հեշտ կգտնեն: Այն նաև հնարավորություն կստեղծի խուսափելու ծրագրերի կրկնությունից, իսկ գործող հասարակական կազմակերպությունների աշխատանքը կդարձնի ավելի արդյունավետ: Առաջիկայում ստեղծվելիք կայքէջում տեղադրված մանրամասները որոշումներ կայացնելու (ֆինանսավորելու) հարցում կդյուրացնեն դոնորների աշխատանքը, ինչը նաև կնպաստի հասարականա կազմակերպություների անկախության աստիճանի բարձրացմանը:

Բացի այդ, ստեղծվելիք կայքէջը հնարավորություն կտա ընդհանուր պատկերացում կազմելու հայաստանյան հասարակական կազմակերպությունների “աշխարհի”, նրանց ծրագրերի, ներկա գործունեության, ապագա ծրագրերի մասին: Մի խոսքով, այն կդառնա մի կայքէջ, որտեղ կկուտակվի Հայաստանի ամենաակտիվ ՀԿ-ների մասին ամբողջական տեղեկատվությունը:

Հասարակական կազմակերպությունների ուղեցույց ծրագիրը ֆինանսավորում է Նիդեռլանդների Թագավորության Մաթրա ծրագրի կողմից.