Իրադարձություն Մայիսի 3-ին, Հայաստանում, ինչպես ամբողջ աշխարհում, նշվեց մամուլի ազատության օրը: Դրանից երկու օր առաջ, “Ֆրիդոմ Հաուս” միջազգային իրավապաշտպան կազմակերպությունը հրապարակեց աշխարհում մամուլի ազատության մասին իր վարկանիշային ցանկը, որտեղ Հայաստանը դասվել էր մամուլի առումով ոչ ազատ երկրների շարքը Սինգապուրի հետ կիսելով 151-րդ տեղը: “Ֆրիդոմ Հաուս”-ի նախորդ զեկույցում Հայաստանը 66 միավորով 144-րդ տեղում էր Կոտ դ’Իվուարի, Գվինեայի, Մալդիվների, Մոլդովայի եւ Պակիստանի հետ։ “Ֆրիդոմ Հաուսի” մեղմ ասած ոչ այնքան մխիթարական զեկույցը հաստատելու եկան երկու իրադարձություն: Մի քանի օրերի ընթացքում բռնության ենթարկվեցին հայաստանցի երկու լրագրողներ` ինտերնետային կայքի համակարգող Արգիշտի Կիվիրյանն ու հեռուստամեկնաբան Նվեր Մնացականյանը: Կատարվածի դրդապատճառներն ու կատարողները բացահայտված չեն:
